Artikel: Koposion tulun, dian

     

 "KOPOSION SABAAGI TULUN"

         Koposion dotokou (tulun) id pomogunan nopo nga miagal nogi do dian i maan tutudai. Soira do tutudan o dian, mogininiba ma ino tu alanak o wokon do tinan dau noontok do linasu tapui. Ingkaa nogi kumaa dotokou i mimoyo dino dian tu osusu, sumukod, lumohing, om "opisok" soira do alanak tokou do kinolohingon. Mantad no dilo, mositi nodi do gunoon dotokou o timpu di noolos mantad Kinorohingan naamot po do poimpasi tokou hiti id pomogunan. Miagal di noilaan tokou, dian nopo di tutudan nga monitiu do kotuongon om manahak kinolosuon kumaa nunu nopo i poindoros dau. Tokou nga koomit nogi do kowoowoyoon miagal dino id koposion tokou. Kowoowoyoon nopo di kinomoi nga  momonsoi nunu nopo maamangan toi ko' kalaja i tongosonong i kapanahak do kounsikahan kumaa tulun id posorili dotokou. Sabaagi do poomitanan, songulun di osonong nopo nga tulun di kiwoyo toluud miagal do obinguhup, obinsianan, monginsasamod di kuminaus, momolingos di kitoruol, om suusuai po. 

       

       Suai ko ino, tulun di osonong nogi nga au popolisok do toilalaan montok kogunoon dau sondii nga potuduk di toilalaan kumaa tulun suai. Toilalaan nopo di maan polisoko' nga omilo do piagalon miampai tusak di minongusak id kopuruan i ulak-ulakan do dupot id talun goowoi di do orubat kopio tu au nokito toi ko' notutunan. Ominog tokou do popoilang toilalaan di kapanahak do kasanangan om nogi mokituduk kokomoi nunu nopo i au tokou po noilaan toi ko nawayaan. Mositi do pugason tokou o kowoowoyoon di au oluud miagal do misingkoilo-ilo sundung do au koilo kokomoi isoiso toguangon. Pataamon nogi daa o topurimanan oikuman soira mokituduk kumaa tulun di poimulok ko yotokou. Maya no dilo, kada tokou no daa pomonsoi nunu nopo karaatan i kotogod om koruol do ginawo do wokon moi do kaanu tokou masi miampai osompuru om kopirati.

      Nung sorohon tokou kopio, opisok nopo o isoiso dian id timpu do totuong nga ngoyon tokou kawagu alanai do dian di wagu moi do au tokou mawor-hawor id kotuongon. Ingkaa nogi kumaa do tulun ngawi tu soira  olohou do Kinorohingan o sosongulun i tapantang, otumbayaan tokou do haro po i sumowoli dau do popotilombus kinosogit-sogiton id taatanga do tulun om nogi momonsoi kalaja di ongosonong hiti id pomogunan.