Susuyan Toniba (suniba): I Kodu-kodu, Kudingking om Gobuk asangal

i. Cerpen = Akronim montok  Cerita Pendek

ii. Suniba = Akronim montok Susuyan Toniba 

Uhu Suniba:   I Kodu-kodu, Kudingking om Gobuk asangal

               Id timpu nopo di pogulu po nga haro duo mogisaasawo I pinungaranan do I Kodu-kodu om I Kudingking. Poingion yolo id iso walai id disan do bawang. Insan tadau, minongoi yolo pomorilik hilo talun maan posiliho do pananaman diolo punti. Asarap po yolo minamanau mantad walai kumaa id talun. “Kodu-kodu, igitan no koti I waig”, ka di Kudingking kumaa di Kodu-kodu.

              “Kuuhoi..ohuyan moti”, ka di Kudingking minongodoi id tanga ralan. Soira nokorikot yolo hilo talun, timpuun dii yolo momorilik. Alaid nodi om kokito di Kudingking I Kodu-kodu do mobo-hobo po do ohuyan. “Arud, tuuhan ko ? Naa onuo iti waig nung tuuhan ko”, ka di Kudingking minimboros kumaa di Kodu-kodu. “Atuukoi.. tuuhan oku moti tomod diti. Tahako kopio doho ino waig”, ka Kodu-kodu suminimbar.

              Au no alaid mantad dii, oruhai nodi do opongo yolo momorilik om nokorikot iso gobuk di lohowon do I Yobuk. “Monguro-nguro kou hino?”,ka di Yobuk mongudio di Kudingking om simbaro’ no di Kudingking o poguhatan dii. Otiil kopio I Yobuk tu mongoi pinsimbul id takapon diolo om mingindakod do kayu di tagadon diolo. Au no alaid nga kabantalai nodi diolo iso nunuk tagayo om maai nodi diolo piuhupai managad o kayu dii. Oruhai nodi do rumatu I nunuk nga indakod nogi I Yobuk id duntu. “Adada! Otiil ko no oi Obuk. Lintuhun koti, ootungan ko moti diti nunuk”, ka di Kudingking mininggiak. Au nogi I Yobuk mokinongou om kahaba’ nodi I nunuk gisom do noonsitan isio. Kapatai di i Yobuk tu nootungan di nunuk.