Artikel BKD: "Poingkuro momogompi Boros Kadazandusun"

“Poingkuro momogompi boros Kadazandusun” - Boogian 1

-            Boros Kadazandusun nopo nga boros di pinotungkus do komolohingan di laid kumaa dotokou. Boros Kadazandusun diti nogi nga boros sandad do tinaru Kadazan Dusun di gunoon soira mogibooboros toi mogiroromut kumaa tiso om tiso. Baino nopo di, okuri no sukod wagu di koilo mimboros boros sandad diti. Mantad dilo do mositi do gompion o boros diti mooi do au orulun tumanud do timpu lumuyung.

                  

             Laang kumoiso do momogompi boros tokou moi do au atagak nga maya no do toguangon do koduuduo molohing (tina om tapa).. Sabaagi do molohing kumaa do tangaanak, kitoguangan yolo do monuduk do boros kumoiso toi ko' boros di tigulu do noilaan. Mantad dilo, mositi do papaajal do boros diti kumaa tangaanak diolo- mantad okoro po. Kiwaa piipiro kawoo monuduk do boros sandad tokou kumaa do tangaanak ngawi miagal do minsingubas mimboros do boros tokou mantad timpu diolo nosusu gisom do osukod. Soira do oubas o tangaanak do mimboros boros sandad diti, osiliu nodi o boros diti sabaagi do boros tina toi ko boros kumoiso di gunoon diolo id koposion sangangadau. Momoguno yolo boros diti soira monongkiboros kumaa tulun ginumuan loolobi no tulun Kadazan Dusun id posorili gisom do kongolohing yolo tu nokosokot no iti Boros Kadazandusun id dila diolo. Mantad dilo, potilombuson nodi kawagu do sukod wagu do monuduk boros diti kumaa tangaanak diolo soira kitanak id timpu dumontol.

                Laang nopo di kumoduo nga maya do gontob toi ko' goos do sikul sondii. Id suang sikul, tulun nopo di minog kopio do momogompi do boros diti nga mongingia Boros Kadazandusun i mongia' do boros diti kumaa tanganak sikul. Pogulu po do mongia yolo do subjek diti, mositi do kuasa'on po daa diolo nunu nopo aspek di mionit miampai toilalaan di oponsol do ilo'on tintod do popoilang diti toilaan kumaa tulun suai loolobi no tangaanak sikul. Tintod do sumuang id kalas, mositi do posodia'on mantad nunu o maan ajalo' om poingkuro kawo mongia' di kosudong kumaa tangaanak sikul. Osonong kopio nung momoguno o mongingia' do kawo pongia'an di kagayat do tinorodok diolo miampai momoguno do multimedia miagal do Microsoft Powerpoint om animasi minggura(video) soira do mongia'. Soira do mongia' do subjek BKD, minog daa yolo do monontuduk do boros diti miampai aawi ginawo to ko' sumontob id kapangajalan diolo id sikul mooi do kaanu o tangaanak sikul do mamarati kokomoi nunu nopo i pinotuduk kumaa diolo.

Tumilombus....(oputan do tinuu).....