Kawo ponuatan ekspositori : Laang-laang do popoimagon sipoot

KAWO PONUATAN EKSPOSITORI

Ekspositori nopo nga iso kawo kopoimogonon paragrap id suang do ponuatan di popotolinahas toi manahak toilaan miampai oniba, otopot om okikip. Ponuatan diti manahak iso toilaan miampai atalang mooi do karati o mambasa’ om polombus do iso topik naantakan kopio(fakta). Suai ko ilo, ponuatan nopo diti nga aiso unsur di mongimbayat do mamabasa’ ngawi do popotilombus mambasa’. Kawo diti nogi nga poposusui iso naantakan toi ko iso taang kalaja miagal do owonsoi isoiso kakamot, poingkuro do momonsoi kakamot dii, poingkuro do noulud o kakamot dii om poingkuro nadadi isoiso kinaantakan. Aspek ponusuyan nogi nga uludo’ tumanud do kronologi.

Uhu : Laang-laang do popoimagon sipoot

Sipoot nopo nga kaanu kopio do popogirot piisaan id taatanga’ rayat om kaanu popoingkawas imej do isoiso pogun. Suai ko ii, ouli nogi o asil do sipoot kumaa pogun. Pongimuhatan nopo nga, nunu laang-laang do popoimagon sipoot id pogun tokou ?

Laang primer montok popoimagon sipoot nopo nga miamapai popogumu kosukupan sukan. Sabaagi do poomitanan, minog do ruhangan o ginumu do kompleks sipoot I haro kakamot sipoot I moden om canggih. Oponsol kopio iti moi do kaanu nodi tulun ginumuan do papanau ababayan sipoot miampai asanang om osinggawa. Mantad dilo, koimbulai nodi o surupu do sipoot di angabaal om opurokis.

Suai ko ii, mositi do poingumuon o program om piboi’an sipoot di mogikaakawo. Kaanu iti do manahak ogumu toilaan kumaa atlit-atlit id pogun tokou. Atlit nopo di kitoilaan nga au oruhai do monokiala’ soira mampayat pialaan id pogun suai. Sabaagi do poomitanan, piboi’an SUKMA di pohoroon tikid duo toun kaanu ogumu toilalaan kumaa atlit-atlit kawawagu id pogun tokou.

Laang potilombus nopo nga maya popoingkakat potorining(coach) di nakalantoi do mangajal tangaanak id sikul. Oponsol laang diti tu potorining di nakalantoi kaanu monuduk tangaanak kokomoi laang om teknik di pointopot soira do minsipoot. Id taang do pogun nopo, omilo tokou do maganu potorining mantad pogun suai moi do popoingkawas kualiti do atlit sukan tokou.

Mantad do kopotolinahasan id sawat, nakatalang nodi do ogumu laang di owonsoi moi do popoimagon do sipoot id pogun tokou. Otootopot nopo, aiso nunu I au milo wonsoyon nung sumontob tokou do popoimagon sipoot miampai au ababasan tu nung au nopo sumontob nga au nodi agampot nunu I iman-imanon. Mantad dilo, otutunan nodi o pogun tokou maya atlit di angabaal miagal di Dato’ Nicol David om I Dato’ Lee Chong Wei.