Tangon pinadalin id BKD : Bujang Terboyoi

Tangon nopo diti nga minaan podolino mantad boros suai om naanu mantad susuyan/tangon do  Indonesia. Kopisanangan mambasa’..

Uhu tangon: BUJANG TERBOYOI

Di pogulu nopo nga haro duo mogisasawo I kumalaja id istana. Kapapaganak nogi di sawo tondu do baragang kusai om pomungaranai no dau do Bujang Terboyoi. Poingkuro po, minonindu kaka I moninindu do kopogowit kopio do koligaganan o buragang diolo dii. Mantad dilo, minonuhu I raja do papataam di buragang dii id hilo id talun.

Olunggui kopio ginawo di tama dii. Minaan dau tanggayai I Bujang Terboyoi kumaa id talun om tuminakad do turu nulu. “Oi ama, iduai oku nopo hiti, tu kasasari o Kinorohingan do poingampai doho. Uli no oi ama”, ka di Bujang Terboyoi minimboros kumaa di tama dau. “Barakatai oku no om ompunai oku no”, ka di tama mimboros miampai mihad-ihad tu awagat tomod ginawo dau minsodu mantad tanak dau.

Suminurut nodi I Bujang Terboyoi id suang do talun. Nosiliu nogi isio do tanakwagu di agaras om awantang. Id iso totuong, nokoinipi isio do langadon kopio koduo-duo molohing dau kumaa dau.

Soira nokosuab, suminoliwan I Bujang Terboyoi mantad talun do pakaayan hilo id istana. Id tindalanon dau, nakawaya isio do mogikaakawo dupot, mondou, gaja’ om wulanut. Ongosianan kopio o suang talun dii kumaa di Bujang Terboyoi tu suminukod miampai aiso molohing om baino mongoi nogi di pogihum do molohing dau.

Mantad dilo, minaan di mondou tudukai I Bujang Terboyoi do sumiliu do opurokis. I rimau nopo nga minonuduk do kabaalan sumaap do sangod  om I gaja’ nopo nga minonuduk kabaalan do gumaras. Minaan nogi di wulanut onuai I Bujang Terboyoi do Sinsing tosundu.

Au no alaid mantad dii, nokorikot I Bujang Terboyoi hilo id istana. Oimayaan ngawi oinsanan tulun di nokokito dau. “Kam isai om nonggo noontodon dilo tanakwagu do awantang kopio”, ka diolo. Pamanau no I Bujang Terboyoi mongoi samba di Sultan moi do popoilo sabap kinorikatan dau. Minongudio di Sultan kokomoi do kinorikatan dau id istana.

“Mokianu oku daa do kasagaan nu mitamong do koduo-duo molohing dilo’, ka di Bujang Terboyoi. Maai di dau potuduko o tutuduk dau kumaa duo tulun molohing di mogisasawo I maamaso po do kumalaja id istana.  “Baa..mai nopo yolo tamangai, aiso kobolingkangan”, ka di sultan dii.

Angatai no di Bujang Terboyoi I koduo-duo molohing dii kumaa id iso wasai. Podsuo no dau yolo, pinapakai do rasuk di ongolumis, om pinaakan po kawagu dau do taakanon di ongopoto. Kalapas dii, maai nodi di Bujang Terboyoi puayo I sinsing tosundu om koingkakat nodi iso istana togingo kopio. Nakagagang kopio koduo-duo molohing dii. Tilombusai nodi di Bujang Terboyoi do suminingkotud id toguang koduo-duo molohing dii.

“Yoku no tanak dikoyu. Yoku no I Bujang Terboyoi. Oi ama om apa ku, ompunai no kinasalaan ku”, ka di Bujang Terboyoi miampai osudu kopio. Sopiihad-ihad podi ngawi yolo tu nongoondos tomod.

Au no alaid mantad kinaantakan dii, pinoontok di Sultan I Bujang Terboyoi kumaa songulun tanak tondu dau. Soira do minidu pogun I Sultan, pinosiliu I Bujang Terboyoi sabaagi do raja.