Tangon : Kalabatu om Ragang Busul

UHU TANGON: “KALABATU OM I RAGANG BUSUL”

Id iso kampung di pogulu po nga poingiyon o tinimungan tulun Dusun di poimpasi id woyo posorili di otoronong kopio. Oinsanan tulun id kampung diti nopo nga poimpasi miampai mogipapantang kumaa tiso om tiso. Orohian nogi yolo momonsoi nunu nopo kalaja maya pogitatabangan moi do oruhai yolo kopongo nunu nopo kalaja di wonsoyon om mantad no dilo do oulud kasari yolo id iso piisaan.

Id kampung dii, haro songulun wowoyoon kampung di pinungaranan do I Kalabatu. I Kalabatu nopo diti nga songulun kusai di agayo kinouluno’, agaras, abagos, obinguhup om au orosian soira do sumangod moi do moningolig do kinoyonon diolo. Mantad no do kowoyo-woyoon di Kalabatu di abantug dilo, kasasari isio do maan pantango’ do tulun id kampung dau.

Insan tadau, ruminikot o tiso rogon taraat I lohowon do Ragang Busul. Ara’at kopio o kokitanan do turos dilo rogon om kawanit nogi do tulun soira do kogigil do tinan dau. Minongoi I Ragang Busul pingulok do lokos di posilihon do tulun kampung sabaagi do tudan do waig diolo. Mantad no dilo, ogumu o tulun kampung do nowonitan soira mongoi sagou do waig mantad hilo lokos noulakan di Ragang Busul.

Mantad no do kinaantakan dilo, sansakit-sakit po om sampatai-patai podi o tulun kampung tu nowonitan do wanit di Ragang Busul. Soira do nokoilo I Kalabatu do abal dii nga tumongob om otogod kopio ginawo disio tu mogingkukuri nodi o tulun hilo id kampung dau. Mantad dilo, minomusorou I Kalabatu do anaru nung poingkuro isio kaanu popotingkod do kotilombus o kaantakan dilo. “Oo..miagal nopo diti nga mositi do ngoyon ku tukaa’ i Ragang Busul dii”, ka di Kalabatu momusorou id ginawo dau.

Au no alaid mantad dii om ongoi no I Kalabatu solowot di Ragang Busul moi do koilo nodi isio nung nu kopio pokionuon di Ragang Busul moi do popotingkod do kaantakan dilo. “Oi Ragang Busul, nunu kopio o pokionuon nu tu momorumbak ko do koposion dahai hiti id kampung”, ka di Kalabatu. “ Oi Kalabatu.. sumaap oku do tulun nu nung haro I tagaras kopio id taatanga dikoyu. Nung haro nga suhuon o tulun dii do mongoi poundaliu turu tontolob do turu ropo o konoruo’ mantad hilo bawang kumaa hilo timpak nulu om maan no potonomo”, ka di Ragang Busul. Kongingis toomod I Kalabatu miampai minimboros” Baa.. ngoyon ku poundoliho” ka.

Ngoyo nodi di Kalabatu poundoliho turu tontolob mantad bawang om potonomo no dau id timpak do nulu. Nokoporong kopio I Ragang Busul do nokokito do ginaras di Kalabatu gisom do nokoungkabang isio. Soira do nopongo do minirangkat do tontolob dii, guli no I Kalabatu id di Ragang Busul miampai mimboros “mantad no do kapatadakan ku do watu dilo, ibok no om kada nodi pomusorou do gumuli hiti id kampung dahai. Ilo watu no o tonduk do batos kito” ka dau. Mantad dilo, ibok no I Ragang Busul minongoi id kinoyonon di osodu kopio mantad kampung di Kalabatu.

Mantad dilo, nokoguli nodi o kowoyo-woyoo do kampung di Kalabatu miagal timpu di timpuun i’. Monongkotoluod ngawi toinsanan tulun kampung kumaa di Kalabatu tu minonunsub di Ragang Busul do mogidu mantad kinoyonon diolo.